"Yuventus" hujumchisi Paulo Dibalaning agenti Xorxe Antun futbolchining yozgi transfer oynasida "Inter"ga o‘tishga rozi bo‘lgani haqidagi xabarlarni rad etdi.

“Bugungi kunda hech qaysi klub bilan kelishuvimiz yo‘q. Hozirda Paulo butun bor e’tiborini mavsum yakuniga, Italiya chempionatining qolgan o‘yinlari va Italiya kubogi finalida muvaffaqiyatli o‘yinga qaratgan", - deya Antun so‘zlaridan iqtibos keltirgan jurnalist Romeo Agresti.

Oldinroq Italiya OAVlari 28 yoshli Dibala 2021/22 yilgi mavsum yakunida "Inter"ga o‘tishga rozi bo‘lgani haqida xabar tarqatgandi.

2021/22-yilgi mavsumda Paulo “Yuventus” safida 35 ta o‘yinda maydonga tushib, 14 ta gol urdi va 6 ta golli uzatmani amalga oshirdi. Transfermarkt.com portali argentinalik futbolchining narxini 40 million yevroga baholamoqda, uning Turin klubi bilan shartnomasi 2022 yilning iyun oyi oxirigacha amal qiladi.