"Chelsi" himoyachisi Markos Alonso shanba kuni bo‘lib o‘tgan "Vulverxempton"ga qarshi o‘yinning tanaffus paytida jamoa bosh murabbiyi Tomas Tuxel bilan jiddiy janjallashib qoldi. Ikkinchi bo‘lim boshida Alonsoning o‘rniga hamyurti Saul tushdi, o‘yindan so‘ng esa Tuxel bu almashtirish taktik sabablarga ko‘ra amalga oshirilganini aytdi.
Ammo jurnalist Natan Gissingning gaplariga ko‘ra, almashtirishga taktik jihatlar emas, balki Alonso va Tuxel o‘rtasida yuzaga kelgan mojaro sabab bo‘lgan. Manba bergan xabarga ko‘ra, murabbiy va futbolchi qattiq tortishgan, shundan so‘ng Tomas o‘z shogirdini almashtirishga qaror qilgan.
Eslatib o‘tamiz, avvalroq matbuot Alonsoni "Barselona"ga o‘tishi mumkinligi haqida xabar bergan edi.
