Xabaringiz bor, joriy yil 2-10 may kunlari Gresiyaning Iraklion shahrida og‘ir atletika bo‘yicha yoshlar o‘rtasida Jahon chempionati bo‘lib o‘tdi.

Ushbu musobaqada dunyoning 61ta davlatidan jami 304 nafar sportchi g‘oliblik uchun bahs olib borishdi. Musobaqaning yakuniy natijalariga ko‘ra, O‘zbekiston terma jamoasi jami 12ta medalga sazovor bo‘ldi, shundan 5 tasi oltin, 5 tasi kumush va 2 tasi bronza medallaridir.

Jahon chempionatida O‘zbekiston sharafini 6 nafar sportchi himoya qildi va ular quyidagi natijalarni qayd etishdi:

Panfilova Jamila (-55 kg vazn toifasida) – 2ta bronza;

Olimov Xojiakbar (-89 kg) – 1ta kumush;

Jabborova Tursunoy (-87 kg) – 3ta oltin;

Amriddinov Sharofiddin (-102 kg) – 2ta oltin, 1ta kumush;

Mirzabayev Mirhosil (+109 kg) – 3ta kumush medal.

Erishilgan natijalar vakillarimizga umumjamoa hisobida faxrli 3-o‘rinni qo‘lga kiritish imkonini taqdim etdi. Bizdan yaxshiroq natijaga Turkiya (7ta oltin, 5ta kumush, 7ta bronza, jami 19 medal bilan 1-o‘rin) hamda Indoneziya (6-0-1, jami 7 medal bilan 2-o‘rin) terma jamoalari erishdi.

Shuningdek, kuchli beshlikdan Armaniston (5-4-5, jami 14ta medal) va Ukraina (5-3-5, jami 13ta medal) terma jamoalari joy olishdi.

Ma’lumot uchun: Jahon chempionatida yuqori natijalarni qayd etishgan O‘zbekiston sport delegasiyasi a’zolari 11 maydan 12 mayga o‘tar kechasi, tungi soat 01:05da yurtimizga qaytib kelishadi.