Madridning “Atletiko” klubi bosh murabbiyi Diyego Simeone “matraschilar” Chempionlar ligasiga yo‘llanma olganidan so‘ng, jamoa hujumchisi Antuan Grizmann haqida ijobiy fikr bildirdi.

Eslatib o‘tamiz, argentinalik mutaxassis shogirdlari 11 may kuni La Liganing 36-turida "Elche"ni 2:0 hisobida mag‘lub etib, YECHLga yo‘llanmani qo‘lga kiritdi.

«Grizmann haqida gapirish - bu klub tarixida eng ko‘p gol urgan futbolchilardan biri haqida gapirish. U bu yil qaytib keldi, o‘zining eng yaxshi formasiga qaytdi va keyin jarohat oldi. Jarohatdan qaytib, yaxshi o‘yinlar o‘tkazdi, ammo raqiblar darvozasini ishg‘ol eta olmadi. Bugun u o‘zi gol ura oladigan paytda De Polga golli uzatma berdi. Bu o‘yinchining buyukligidir ”, - dedi argentinalik murabbiy Movistar nashriga bergan intervyusida.

Fransiyalik hujumchi o‘tgan yilning avgust oyida “Barselona”dan “Atletiko”ga qaytgan edi. 31 yoshli futbolchi joriy mavsum La Ligada 3 ta gol urdi va shuncha golli uzatmani amalga oshirdi.