Endi bemalol ta’kidlash mumkin: Shotlandiya futbolining ikki bayroqdoridan biri - «Reynjers» orada bukilgan qaddini to‘liq tikladi.
Har holda, glazgoliklar kechagi tanazzulni unutib, yana yevrokubokka changal solmoqdalar. Vaholanki, bu jamoa bundan 10 yilcha oldin bankrot holatida Shotlandiya Ikkinchi ligasi (uchinchi raqamli divizion)ga tushirib yuborilgandi. Bugun esa u Yevropa Ligasi finalida!
10 yillik qoyilmaqom tarix! «Reynjers» shu dekada oralig‘ida bankrotlikdan yevrokubok finaligacha bo‘lgan yo‘lni barqaror bosib o‘tdi. Bir nafasda. Deylik, glazgoliklar Shotlandiya elit ligasi - Premyer-liga ortida turuvchi Chempionshipga qaytish uchun atigi 2 mavsum sarflashdi. Ya’ni 2012 yili quyiga badarg‘a qilingan jamoa qatorasiga 2 mavsum yuqoriga ko‘tarilishni paysalga solmadi. Keyin bir tin oldiyu, 2016 yili Chempionshipda g‘olib chiqib, kuchlilar safiga ko‘tarildi. 2021 yilga kelib, jamoa oxirgi 10 yil badaliga ilk marta chempionlikni nishonladi. Yana mag‘lubiyatga uchramagan holda! O‘sha mavsum jamoani mashhur Stiven Jerrard boshqarganini ham eslatish kerak.
Mana, «Reynjers» joriy mavsum yevroarenada ham o‘ynashni unutmaganini to‘liq isbotlab, Yevropa Ligasi finaliga yo‘l ochdi. Agar shotlandiyaliklar Sevilya finalida «Ayntraxt»dan ham ustun kelishsami, oxirgi 10 yillik klub tarixiga ertaknamo davr sifatida yoziladi.
