Superliga 9-turidan o‘rin egallagan “Metallurg” – “Dinamo” (2:1) uchrashuvidan keyin o‘tkazilgan matbuot anjumanida mezbonlar bosh murabbiyi Luisma Ernandes o‘z fikr mulohazalarini bildirdi.

- O‘yin haqida

- O‘yin yetarli darajada qiyin bo‘ldi deyish mumkin. Uchrashuvning birinchi taymida tashabbus to‘liq “Metallurg” jamoasi tomonida edi. Ikkinchi taym boshida esa jarohat bois darvozabonimizni almashtirdik. Shuning bois gol o‘tkazib yubordik. Lekin biz uchrashuvning so‘nggi soniyalarigacha o‘zimizning futbolimizni namoyish etdik: sifatli kombinasiyalar, sifatli to‘p uzatishlar va sifatli gol... Bugungi uchrashuv nafaqat biz uchun, balki shahrimiz uchun ham juda mas’uliyatli uchrashuv edi. O‘ylashimcha zimmamizdagi vazifani biz qoniqarli tarzda bajardik. “Dinamo” jamoasi menda iliq taassurot qoldirdi. Oxirigacha kurashdi, chiroyli futbol namoyish etdi.

- Jamoaning so‘nggi uchrashuvlardagi qahramoni Damir Temirov to‘g‘risida to‘xtalsangiz...

- Yosh, shuning barobarida tajribali o‘yinchilarimizdan biri. O‘zining eng ijobiy xislatlarini namoyish etib kelayapti. Fikrimcha, u O‘zbekistonning bugungi kundagi eng yaxshi o‘yinchilaridan biri.

- “Dinamo” so‘nggi uchta o‘yinni so‘nggi daqiqalarda o‘tkazib yuborilayotgan gollar evaziga boy beryapti. O‘yinga tayyorgarlik jarayonida raqibni qanchalik o‘rgangandingiz, shu jihatlarga ham e’tibor qaratganmidingiz?

- “Dinamo”ning o‘ziga xos o‘yini mavjud. Juda ixcham, ishonchli o‘ynaydigan jamoalardan. Jamoalarning kuch va imkoniyatlarini vaqt ko‘rsatadi. Ayni paytda Superliga jamoalarining kuchlari shu darajada tengki, o‘yin davomidagi mayda detallar, kichik xatolar ham ularning o‘rni va mavqeiga jiddiy ta’sir ko‘rsatmoqda.