Davr taqozosi va ichki imkoniyatlarni ishga solish maqsadida "Neftchi" futbol klubi rahbariyati murabbiylar shtabini legioner mutaxassislar bilan mustahkamlashga qaror qildi.
Xorvatiyalik Zoran Vulich va Mladen Praliya bundan buyon bosh murabbiy Ilhom Mo‘minjonovga assist-murabbiy va jismoniy tarbiya bo‘yicha murabbiy sifatida yordam beradilar. Farg‘ona futbolchilariga mahorat va malaka oshirishda amaliy yordam ko‘rsatadilar. Ular nafaqat Xorvatiya, balki, Yevropa, Osiyo va Amerika futbol klublarida faoliyat yuritib, katta tajriba va mahorat egasi sifatida muxlislar va mutaxassislar e’tiborini qozonishgan.
Zoran Vulich futbolchilik faoliyatini Xorvatiyaning "Xayduk" klubida boshlagan.So‘ngra Ispaniyaning "Malyorka" va Fransiyaning "Nant" klublarida mahoratini namoyish etgan. 1998 yildan jonajon klubi "Xayduk"ka bosh murabbiy etib tayinlangan. Keyinchalik Rossiyaning" Luch-Energiya", Xorvatiyaning "Split", Moldovaning" Sherif", Qozog‘istonning "Atirau", Gresiyaning" Appolon Smirnis" jamoalarida faoliyat yuritgan mutaxassis o‘z mamlakatining 19 yoshlilar terma jamoasiga rahbarlik qilgan.
Mladen Praliya ham futbol olamining tajribali mutaxassisi sifatida keng jamoatchilikning e’tibori va izzat-hurmatini qozonib kelmoqda. Xorvatiyaning "Xayduk", Germaniyaning "Gamburg" klubida malaka va mahoratini oshirib, murabbiylik faoliyatini Singapurning "Singapur Armed Forses" jamoasida davom ettirgan. Kasbdoshi Zoran Vulich bilan Vladivostokning "Luch-Energiya" klubi rivojiga munosib hissa qo‘shgan.
