"Udineze" hujumchisi Jerar Delofeu "Napoli"ga o‘tishga yaqin turibdi, deb xabar bermoqda Calciomercato nashri.
Manbaga ko‘ra, neapolliklar futbolchi uchun "Vest Xem" klubi bilan kurashmoqda. Futbolchining o‘zi yozgi transfer oynasida jamoasini o‘zgartirishga tayyor, ammo Italiyada qolishni afzal ko‘rmoqda.
Delofeu “Udineze” safida 2020 yildan buyon to‘p suradi. Futbolchining shartnomasi 2024 yilgacha mo‘ljallangan.
Joriy mavsumda 28 yoshli ispaniyalik “oq-qoralar” safida barcha musobaqalarda 34 ta o‘yinda maydonga tushib, 12 ta gol urdi va 5 ta golli uzatmani amalga oshirdi.
Transfermarkt portali "Barselona" tarbiyalanuvchisini 10 million yevroga baholamoqda.
