Rossiya chempionatining so‘nggi 30-turida "Rubin" va "Ufa" jamoalari o‘zaro to‘qnash kelishdi va bu o‘yin Premyer-ligani tark etadigan jamoa nomiga oydinlik kiritib berdi. Qozonliklarni mazkur bahsda durang ham qanoatlantirsa, mehmonlarga faqat va faqat g‘alaba kerak edi.

Birinchi bo‘lim tugashiga 8 daqiqa qolganida hakam "Ufa" darvozasiga tomon penalti belgiladi va uni Lisakovich aniq amalga oshirib, hisobni ochdi.

Ikkinchi bo‘lim boshida Kamilov hisobni tenglashtirgan bo‘lsa, 90-daqiqa Ortis "Ufa"ni oldinga olib chiqdi. Hakam esa ikkinchi bo‘limga 4 daqiqa qo‘shib berdi. 94-daqiqa "Rubin" futbolchisining zarbasidan so‘ng to‘p ustunga tegdi. 98-daqiqada esa mezbonlar jarima zarbasini amalga oshirgan paytda Oston O‘runov o‘z jarima maydoni ichida raqib futbolchisi Talbining oyog‘idan bosib, uni yiqitda. Hakam esa VAR bilan maslahatlashdi, vaziyat videotakrorini tomosha qildi. Natijada u penalti belgilab, o‘zbekistonlik futbolchiga sariq kartochka ko‘rsatdi.

Bu safar ham mas’uliyatni LIsakovich o‘z zimmasiga oldi va penaltini tepdi. To‘p esa ustunga tegib, maydonni tark etdi.

Shu tariqa, "Rubin" quyi ligaga yo‘l oldi. "Ufa" esa RPLda jon saqlab qolish uchun quyi liga jamoalaridan biri bilan pley-off bahsida ishtirok etadi.