O‘zbekiston o‘smirlar terma jamoasi bosh murabbiyi Jamoliddin Rahmatullayev Osiyo chempionati saralash bosqichiga tashlangan qur’a borasida o‘z fikrlari bilan o‘rtoqlashdi.

"Osiyo chempionati saralash bosqichiga tashlangan qur’ani to‘g‘ridan-to‘g‘ri kuzatib bordim. Raqiblarimiz — Janubiy Koreya, Bruney va Shri Lanka. Bu jamoa bilan maqsadlarimiz yuqori. Nafaqat Osiyo chempionati, balki jahon chempionatida ishtirok etishni maqsad qilganmiz. Yaqinda bo‘lib o‘tgan Markaziy Osiyo futbol assosiasiyasi (CAFA)ning U-17 musobaqasi shuni ko‘rsatdiki, agar biz musobaqaga yanada yaxshiroq tayyorgarlik ko‘rsak, har qanday jamoaga qarshi o‘ynay olamiz.

Tayyorgarlikni optimal darajaga olib chiqishga harakat qilamiz. Guruhimizdagi raqiblardan kelib chiqib tayyorgarlik rejasini tuzib oldik. O‘rtoqlik o‘yinlari borasida raqiblar bilan aloqaga chiqishni boshladik. Nasib qilsa, saralash bosqichida yaxshi formada bo‘lamiz", — dedi Rahmatullayev.