O‘zbekiston yoshlar (U20) terma jamoasi bosh murabbiyi Ravshan Haydarov Osiyo chempionati saralash bosqichiga tashlangan qur’a borasida o‘z fikrlari bilan o‘rtoqlashdi.

"Afsuski, koronavirus pandemiyasi tufayli bu avlod futbolchilari bitta qit’a chempionatini o‘tkazib yuborishdi. Bu borada uzilish yuzaga keldi. Keyingi musobaqani o‘z yurtimizda o‘tkazayotganimiz uchun saralash o‘yinlarining ahamiyati yo‘qdek go‘yo. Ammo biz saralash o‘yinlariga ham jiddiy qaraymiz. Chunki sparring-raqib topish oson ish emas.

Aslida ushbu saralash bahslarida qatnashmasligimiz ham mumkin edi. Ammo biz qatnashishni lozim topdik. Saralash o‘yinlari orqali raqiblarini kuchi anglab, o‘z imkoniyatlarimizni sinovdan o‘tkazib olamiz, turnir ritmini his qilib olamiz. Bu jihatdan saralash bosqichi biz uchun foydali bo‘ladi.

Saralash bosqichi Saudiya Arabistonida bo‘lib o‘tadi. Bundan tashqari, Xitoy, Myanma va Maldivga qarshi qiziqarli o‘yinlar bizni kutib turibdi.

Bu yoshdagi jamoalarda raqiblarning kuchiga baho berish qiyin. Ularning kuchiga baho berishda o‘sha malakatda futbol qanday yo‘lga qo‘yilganini inobatga olamiz. Masalan, Saudiyada futbol tizimli yo‘lga qo‘yilgan, doimo turli turnirlarda ishtirok etadi. Xitoy haqida ham shunday deyishimiz mumkin. Bu mamlakatda futbol infratuzilmasi yaxshi rivojlangan.

Oldimizdagi FIFA kunlaridan foydalanib, birinchi marta xorijga chiqib, xalqaro o‘yinlarda ishtirok etamiz. Ozarboyjon va Belarusga qarshi 2tadan o‘yin o‘tkazamiz. Ushbu xalqaro o‘yinlar orqali jamoamizning qiyin raqiblarga qarshi qanchalik tayyor ekanini bilib olamiz. Albatta, shu orqali o‘sishda davom etishimiz kerak", — dedi Ravshan Haydarov.