Ўзбекистон ёшлар (U20) терма жамоаси бош мураббийи Равшан Ҳайдаров Осиё чемпионати саралаш босқичига ташланган қуръа борасида ўз фикрлари билан ўртоқлашди.

"Афсуски, коронавирус пандемияси туфайли бу авлод футболчилари битта қитъа чемпионатини ўтказиб юборишди. Бу борада узилиш юзага келди. Кейинги мусобақани ўз юртимизда ўтказаётганимиз учун саралаш ўйинларининг аҳамияти йўқдек гўё. Аммо биз саралаш ўйинларига ҳам жиддий қараймиз. Чунки спарринг-рақиб топиш осон иш эмас.

Аслида ушбу саралаш баҳсларида қатнашмаслигимиз ҳам мумкин эди. Аммо биз қатнашишни лозим топдик. Саралаш ўйинлари орқали рақибларини кучи англаб, ўз имкониятларимизни синовдан ўтказиб оламиз, турнир ритмини ҳис қилиб оламиз. Бу жиҳатдан саралаш босқичи биз учун фойдали бўлади.

Саралаш босқичи Саудия Арабистонида бўлиб ўтади. Бундан ташқари, Хитой, Мьянма ва Мальдивга қарши қизиқарли ўйинлар бизни кутиб турибди.

Бу ёшдаги жамоаларда рақибларнинг кучига баҳо бериш қийин. Уларнинг кучига баҳо беришда ўша малакатда футбол қандай йўлга қўйилганини инобатга оламиз. Масалан, Саудияда футбол тизимли йўлга қўйилган, доимо турли турнирларда иштирок этади. Хитой ҳақида ҳам шундай дейишимиз мумкин. Бу мамлакатда футбол инфратузилмаси яхши ривожланган.

Олдимиздаги ФИФА кунларидан фойдаланиб, биринчи марта хорижга чиқиб, халқаро ўйинларда иштирок этамиз. Озарбойжон ва Беларусга қарши 2тадан ўйин ўтказамиз. Ушбу халқаро ўйинлар орқали жамоамизнинг қийин рақибларга қарши қанчалик тайёр эканини билиб оламиз. Албатта, шу орқали ўсишда давом этишимиз керак", — деди Равшан Ҳайдаров.