Premyer-liga mavsumining aql bovar qilmaydigan yakunidan so‘ng hammaga o‘ziga kelib olish uchun biroz vaqt kerak bo‘ldi. Bu haqiqatan ham dramatik va hissiyotlar boy yakun edi. Va buning eng yaxshi tomoni shundaki, shou davom etadi.
Bir narsa aniqki, “Manchester Siti” va “Liverpul” o‘rtasidagi raqobat hozir Yevropa futbolidagi eng yaxshisi bo‘lib qolmoqda.
So‘nggi to‘rt mavsumni oladigan bo‘lsak, ikkitasida chempionlik so‘nggi turda hal bo‘lgan. Va "Siti" 2018/19 yilgi chempionatda "Brayton" bilan hech qanday muammoga duch kelmagan bo‘lsa ham, intriga so‘nggi daqiqalargacha saqlanib qolgan. "Liverpul" yoki "Siti" uchun sezilarli ustunlik o‘ziga xos taqvim va Covid davridagi chempionatlarida edi.
O‘sha to‘rt mavsumning uchtasida "Siti" va "Liverpul" 90 ochkodan ko‘p ochko to‘plashdi, ulardan ikkitasida buni birgalikda uddalashdi. Va bu, albatta, barqarorlik va hukmronlikning ajoyib ko‘rinishi. Taqqoslash uchun: bungacha APL tarixida uch ochkolik tizimga o‘tgandan so‘ng 90 va undan ko‘p ochkoli marra bor-yo‘g‘i yetti marta kesib o‘tilgan: “Manchester Yunayted” – 1999/00 ( 91), "Arsenal" - 2003/04 (90), "Chelsi" - 2004/05 (95), "Chelsi" - 2005/06 (91), "Manchester Yunayted" - 2008/09 (90), "Chelsi" - 2016/17 (93) va " Manchester Siti" - 2017/18 (100).
Keyinchalik shunday bo‘ldi: 2018/19 yilgi mavsum - "Siti" (98) va "Liverpul" (97); 2021/22 mavsum - "Siti" (93) va "Liverpul" (92).
Va nihoyat, qiziqarli arifmetikaning so‘nggi qismi: to‘rt mavsumdagi barcha ochkolarni jamlasangiz, "Siti" 358 ochko to‘plagan, "Liverpul" esa 357. Ajoyib natija shunday emasmi.
Yevropa futbolida bunday epik qarama-qarshilik anchadan beri bo‘lmagan. Balki bosh rollarda Leo Messi va Krishtianu Ronaldu o‘ynagan 2010 yillardagi Ispaniya Klasikosi bundan pastroq bo‘lishi mumkin. "Real Madrid" va "Barselona" o‘rtasidagi to‘qnashuvlar ajoyib tomoshaga aylanib ketardi va butun dunyo e’tiborini tortardi, ammo 2009 va 2018 yillar oralig‘ida (2014 yilgi "Atletiko" chempionlik mavsumi bundan mustasno) chempionlik intrigasi so‘nggi turgacha bor-yo‘g‘i 3 marta saqlanib qolgan.
Va eng muhimi, biz ushbu shouning davomini yana ko‘ramiz. Premyer-ligada "Siti" va "Liverpul" bilan raqobatlashadigan hech kim yo‘qdek. "Chelsi" egasining o‘zgarishi va u bilan birga keladigan o‘zgarishlar davrini boshdan kechirmoqda va avgust oyida "Stemford Bridj"da qanday jamoa bo‘lishi hozircha aniq emas. Erik ten Xag "Manchester Yunayted" bilan uzoq yo‘l bosib o‘tadi.
Bu jamoalarga qandaydir tarzda ta’sir qilishi mumkin bo‘lgan yagona narsa noyabr va dekabr oylarida bo‘lib o‘tadigan Jahon chempionati. Hech kim bunday tajribaga ega bo‘lmagan va vaziyat har qanday tarzda o‘zgarishi mumkin, ayniqsa Qatardagi iqlimni hisobga olgan holda. Futbolchilar terma jamoalardan qachon va qanday holatda qaytishlari muhim. Nima bo‘lgan taqdirda ham Angliya futboli bizni zeriktirib qo‘ymasligi aniq!
