“Aral samali U-19” o‘z yosh toifasida o‘tkazib kelinayotgan O‘zbekiston chempionatida ishtirok etmaydi. Jamoa hozirga qadar mazkur musobaqada faqatgina 1 ta o‘yinda ishtirok etgan bo‘lib, Reglament asosida mazkur uchrashuv natijasi bekor qilinadi.

O‘zbekiston Professional futbol ligasi “Aral samali” klubiga mavsumni boshlash oson bo‘lmaganidan kelib chiqib, qator masalalarda yengillik berishga harakat qildi. Shunga qaramay, “Aral samali” bu imkoniyatlardan foydalanmadi.

U-19 jamoasini tashkil qilish va uning chempionatdagi ishtirokini ta’minlash OFK lisenziyalash talabining asosiy mezonlaridan biri hisoblanadi. Shundan kelib chiqib, “Aral samali” futbol klubi mazkur talabni bajarmagan hisoblanadi.

Ma’lumot uchun, 2022 yilgi mavsumdan e’tiboran Qoraqalpog‘iston Vazirlar Kengashi respublika futbol assosiasiyasi qoshida yangi “Aral” jamoasiga asos solgan bo‘lib, ayni paytda mazkur jamoa Birinchi liga musobaqasida peshqadam bo‘lib turibdi (“Aral samali” esa Pro ligada 8-o‘rinda bormoqda). Qoraqalpog‘iston jamoalaridan birining 2023 yilgi mavsumda ham Pro ligada ishtirok etishi uchun endilikda faqat 1 ta yo‘l mavjud: “Aral” jamoasining Birinchi ligani peshqadam sifatida yakunlashi.