Bugun “Dalmantiko cup” musobaqasida 2-tur uchrashuvlari o‘tkazildi.

Dastlab G‘ulom Halimtoyev murabbiyligidagi “Bunyodkor-2011” ikkinchi uchrashuvida ham g‘alaba qozonib, muddatidan avval keyingi bosqich masalasini hal qildi. Mahalliy OSK bilan kuch sinashgan tarbiyalanuvchilarimiz Abduvoris Qudratovning yagona goli evaziga g‘alaba qozondi.

Shundan so‘ng musobaqani mag‘lubiyat bilan boshlagan Alisher Ibrohimov ustozligidagi “Bunyodkor-2009” maydonga chiqdi. Xorvatiyaning “Maksimir” klubiga qarshi to‘p surgan tarbiyalanuvchilarimiz ishonchli o‘yin bilan g‘alaba nashidasini surdi. Emmanuel Emonkpairening dubli “qaldirg‘ochlarimiz”ga dastlabki uch ochkoni taqdim etdi.

Eng katta yosh toifasidagi kecha nursiz durangga imzo chekkan Miraziz Mirzaahmedov boshchiligidagi “Bunyodkor-2008” bugun bir yo‘la ikkita o‘yinda maydonga chiqib, har ikkalasida ham raqibni “taslim” etdi. Dastavval Kosovodan tashrif buyurgan “Drini Bardxe” darvozasi naqd 5 (!) marta ishg‘ol etilgan bo‘lsa, so‘ng mahalliy “Solin” ham ikki marta xafa qilindi. Shu tariqa “Bunyodkor-2008” ikki uchrashuvda raqiblarni 7 marta maydon markaziga chorladi.

“Dalmatinko cup”. 2-tur
"BUNYODKOR-2011" - OSK (Xorvatiya) - 1:0
Gol: Abduvoris Qudratov.

"BUNYODKOR-2009" – “MAKSIMIR” (Xorvatiya) - 2:1
Gollar: Emmanuel Emonkpaire.

"BUNYODKOR-2008" – “DRINI BARDXE” (Kosova) - 5:0
Gollar: Abdulvoris Hojimurodov, Sadriddin Hasanov, Jasur Sharipov, Behruz Taymetov, Javohir Orziqulov.

"BUNYODKOR-2008" – “SOLIN” (Xorvatiya) - 2:0
Gollar: Ibrohim Akbarov, Sadriddin Hasanov.