Mamlakatimizda o‘tkazilayotgan futbol bo‘yicha U23 Osiyo kubogida O‘zbekiston Olimpiya terma jamoasi ikkinchi uchrashuvini o‘tkazdi. Qatarga qarshi kechgan bahsda vakillarimiz yirik 6:0 hisobida g‘alaba qozonib, muddatidan avval chorak final yo‘llanmasini qo‘lga kiritishdi.

Qayd etish joiz, bu musobaqa tarixidagi (U23 turnirida) eng yirik g‘alaba bo‘ldi. Bungacha turnir tarixidagi eng yirik hisob 5:0 bo‘lib, 2016 yilda Janubiy Koreya Yaman ustidan, 2020 yilda esa Tailand Bahrayn ustidan shunday hisobda g‘alaba qozonishgan edi.

Endi jamoamiz uchinchi tur uchrashuvini 7 iyun kuni Eronga qarshi Qarshida o‘tkazadi. Guruhning narigi uchrashuvida eronliklar Turkmaniston yoshlariga 1:2 hisobida imkoniyatni boy berishdi.

Yoshlarimiz muddatidan avval guruhda 1-o‘rinni qo‘lga kiritib bo‘lishdi. Boisi, Eron va Qatar har qanday holatda ham bizga yeta olishmaydi. Turkmaniston esa ochkolar bo‘yicha tenglashganda ham o‘zaro o‘yin bo‘yicha ortda bo‘ladi.

Eslatib o‘tamiz, ushbu yosh toifasidagi Osiyo chempionati beshinchi marta o‘tkazilayotgan bo‘lib, O‘zbekiston olimpiya terma jamoasi chempionlikni qo‘lga kiritgan bo‘lsa, 2020 yilgi turnirda jamoamiz to‘rtinchi pog‘onani band etgandi.