«Manchester Siti» hujumchisi Gabriel Jezus «Real»ga o‘tishi mumkin.

Marca’ning yozishicha, Madrid klubi transfer narxi 45—50 million yevro atrofida bo‘lgan Jezusni sotib olish imkoniyatlarini ko‘rib chiqmoqda. Hujumchining o‘yinlari «Real» rahbariyati va jamoa bosh murabbiyi Karlo Anchelottiga yoqadi.

Gabrielga to‘lanadigan maosh ham yuqori bo‘lmaydi — Angliyada u taxminan yiliga 7,5 million yevro maosh oladi.

Kelishuvlarda yagona to‘siq fuqaroligi Yevropa Ittifoqidan bo‘lmagan futbolchilar uchun ajratilgan kvota bo‘lishi mumkin. Hozirda jamoada Vinisius Junior, Rodrigo Goes va Eder Militao ushbu kvotalarni egallab turibdi. Shu vaqtga qadar madridliklar Vinisius Ispaniya pasportini oladi deb umid qilgandi, ammo jarayon biroz sekin kechmoqda. Bu esa Jezus transferiga xalaqit qilishi mumkin.

25 yoshli Gabriel 2021/22 yilgi mavsum «Manchester Siti» safida barcha musobaqalarda 41 ta o‘yinda maydonga tushib, 13 ta gol va 11 ta golli uzatmaga mualliflik qildi.