Xabaringiz bor, ayni paytda yurtimizda, ya’ni, Toshkent va Qarshi shaharlarida U-23 Osiyo chempionati o‘tkazilmoqda. Mazkur chempionatning “A” guruhi, 3-turidan o‘rin olgan, 7 iyun kuni Qarshidagi “Markaziy” o‘yingohda bo‘lib o‘tgan O‘zbekiston – Eron (1:1) U-23 terma jamoalari o‘rtasidagi o‘yinga 20 mingga yaqin muxlis tashrif buyurdi.

Ma’lumki, bugundan Namanganda Osiyo kubogi – 2023 saralash bosqichining “S” guruhi o‘yinlari boshlanadi. Bugun mazkur guruhning 1-turidan o‘rin olgan Tailand – Maldiv orollari, O‘zbekiston – Shri-Lanka terma jamoalari o‘rtasidagi uchrashuvlar bo‘lib o‘tadi.

Ushbu o‘yinlar uchun chiptalar 6 iyun kuni sotuvga chiqdi va ayni paytda chiptalar sotuvi avjida!
Chiptalar narxi 10.000 so‘m etib belgilangan hamda muxlislar bitta chipta xarid qilgan holda, har ikki bahsni bevosita stadionda tomosha qilish imkoniyatiga ega bo‘lishadi.

Muxlislardan mazkur o‘yinlarga tashrif buyurgan holda, Namanganning haqiqiy futbol viloyati ekanligi, milliy terma jamoamizni bevosita stadionda qo‘llab-quvvatlashlarini so‘rab qolamiz.

Xo‘sh, bugungi bahsda Qarshidagi muxlislar rekordi yangilanadimi?
Shunga umid qilgan holda, ishqibozlardan bugungi uchrashuvlarga tashrif buyurib, stadion o‘rindiqlarini to‘ldirishlariga tilakdoshmiz.