Kiyevning "Dinamo" klubi sobiq futbolchisi, ayni paytda "Paxtakor" klubi sport direktori lavozimida ish boshlagan Maksim Shaskix Ukriana terma jamoasi sobiq sardori Anatoliy Timoshchuk haqida o‘z fikrini bildirib o‘tdi. Eslatib o‘tamiz, Rossiya harbiylari Ukrainada jang qilishayotgan bo‘lsa-da, Timoshchuk Sankt-Peterburgning "Zenit" jamoasi murabbiylar shtabida ishlashda davom etmoqda.

«Bu uning tanlovi va qarori. Demak, uning qalbi bo‘m-bo‘sh. U Ukraina terma jamoasi safida to‘p tepayotganida bayroqni mahkam tutdi, sardorlik bog‘ichini taqdi, boshiga va qo‘liga Ukraina ramzlari tushirilgan lentalarni taqdi, bayroqlar chizdi. Ammo, ma’lum bo‘lishicha, uning qalbi bo‘m-bo‘sh ekan.

Ikkiyuzlamachi insonlarni tushunmayman. O‘ylashimcha, u Ukrainaga, uyiga va bu yerda yashash uchun qaytmoqchi emasdi. U barchasini tarozuga solib ko‘rib, o‘ylagan bo‘lishi mumkin: "Mayli, men haqimda bir-ikki oy gapirishadi-yozishadi, keyin esa unutishadi".

Shu paytgacha mavjud bo‘lgan vatanparvarlik qayoqqa yo‘qolib qolganini tushunish qiyin. Sen yo oxirigacha vatanparvar bo‘lib qol, yoki hammasi yaxshi bo‘lib turganida o‘zingni bunday ko‘rsatmasliging kerak edi», — dedi Shaskix.

Ma’lumot o‘rnida. Ukraina futbol federasiyasi Tartib-intizom qo‘mitasi mart oyida Timoshchukni murabbiylik lisenziyasi, sovrinlardan mahrum qilib, Ukrainada har qanday futbol faoliyatidan chetlatish haqida qaror chiqardi.