Киевнинг "Динамо" клуби собиқ футболчиси, айни пайтда "Пахтакор" клуби спорт директори лавозимида иш бошлаган Максим Шацких Укриана терма жамоаси собиқ сардори Анатолий Тимошчук ҳақида ўз фикрини билдириб ўтди. Эслатиб ўтамиз, Россия ҳарбийлари Украинада жанг қилишаётган бўлса-да, Тимошчук Санкт-Петербургнинг "Зенит" жамоаси мураббийлар штабида ишлашда давом этмоқда.

«Бу унинг танлови ва қарори. Демак, унинг қалби бўм-бўш. У Украина терма жамоаси сафида тўп тепаётганида байроқни маҳкам тутди, сардорлик боғичини тақди, бошига ва қўлига Украина рамзлари туширилган ленталарни тақди, байроқлар чизди. Аммо, маълум бўлишича, унинг қалби бўм-бўш экан.

Иккиюзламачи инсонларни тушунмайман. Ўйлашимча, у Украинага, уйига ва бу ерда яшаш учун қайтмоқчи эмасди. У барчасини тарозуга солиб кўриб, ўйлаган бўлиши мумкин: "Майли, мен ҳақимда бир-икки ой гапиришади-ёзишади, кейин эса унутишади".

Шу пайтгача мавжуд бўлган ватанпарварлик қаёққа йўқолиб қолганини тушуниш қийин. Сен ё охиригача ватанпарвар бўлиб қол, ёки ҳаммаси яхши бўлиб турганида ўзингни бундай кўрсатмаслигинг керак эди», — деди Шацких.

Маълумот ўрнида. Украина футбол федерацияси Тартиб-интизом қўмитаси март ойида Тимошчукни мураббийлик лицензияси, совринлардан маҳрум қилиб, Украинада ҳар қандай футбол фаолиятидан четлатиш ҳақида қарор чиқарди.