O‘tgan hafta «Liverpul» yangi transferini e’lon qildi - «Fulxem» a’zosi Fabiu Karvalyu bilan shartnoma imzolandi.
Bu futbolchi o‘zi kim, uning «qizillar»ga qanday nafi tegishi mumkin, kelishuvga qancha sarflandi? Shu va boshqa savollarga javob topamiz.
BU KIM O‘ZI?
Fabiu Karvalyu - Angliya yoshlar termasi a’zosi, ammo familiyasidan payqash qiyin emaski, uning asl vatani Portugaliya hisoblanadi. Futboldagi ilk qadamlarini aynan shu mamlakatda, aniqrog‘i, «Benfika» akademiyasida qo‘ygan. O‘smirlik chog‘larida uning oilasi Angliyaga ko‘chib o‘tdi, yigitcha esa «Fulxem» bilan shartnoma imzoladi.
Fabiu asta-sekin o‘sishga erisha boshladi, grandlarning e’tiborini qozondi, 17 yoshida APLda debyutini nishonlagach, qiziqish bir necha karra oshdi. Gap-so‘zlarga ko‘ra, uning transferiga «Real», «Liverpul», «Chelsi» va Yevropaning bir nechta top-klublari qiziqqan, lekin Karvalyu voqealar rivojini tezlashtirmaslik maqsadida «Fulxem» bilan yangi kelishuv tuzdi.
Mavsum-2020|2021da uning jamoasi elitani tark etdi, bu esa Karvalyuga qo‘l keldi. Futbolchi Chempionship-2021|2022dagi ishtirok orqali asosiy tarkibga muqim joylashdi. Umumiy hisobda, kelib chiqishi portugaliyalik bo‘lgan futbolchi 31ta to‘liq o‘yinda jami 2839 daqiqa to‘p surib, 10ta gol va 8ta assist muallifiga aylandi - 19 yoshli yigitcha uchun chakkimas.
«LIVERPUL» QANCHA SARFLADI?
Mersisaydliklar yana bir bor transfer bozorida samarali yurish qilishdi, ko‘pchilikning diqqat markazida turgan yosh futbolchiga ega bo‘lishdi. Aytishlaricha, xarid jami 5 mln. yevroga tushdi, Fabiuning turli ko‘rsatkichlari evaziga «Fulxem» yana 3 mln.ga ega bo‘lishi mumkin. Bu mablag‘ kamdek ko‘rinishi mumkin, biroq APLga endigina qaytgan klub yanada ko‘proq pul so‘rolmasdi, zero Karvalyuning shartnomasi shu yozda yakunlanardi.
UNING USTUNLIGI NIMADA?
Karvalyu - maydon markazida to‘p suradi, lekin ba’zan yarim himoya qanotida foyda keltirishi mumkin. Mabodo, unga «Liverpul»da yangi rol topib berishgan taqdirda ham, bu muammo bo‘lmaydi, zero Fabiu notanish ko‘rsatmalar asosida yangi pozisiyaga osongina moslasha olishini avvalroq namoyish etib ulgurgan. Karvalyu yaxshigina texnika sohibi, zarbalari kuchli, chaqqon, futbolni tushunish borasida yoshiga xos bo‘lmagan salohiyatga ega.
Katta ehtimol, Yurgen Klopp unga hozirning o‘zida boshlang‘ich tarkibdan joy kafolatlamaydi, biroq Karvalyuning tarkibni boyitishi, shuningdek, «Liverpul» markaziy chizig‘ini yoshartirishi aniq. Fabinyo, Nabi Keyta, Milner, Xenderson, Tiago, Oksleyd-CHemberlen - bular ayni payt Klopp tanlashi mumkin yarim himoyachilar tarkibi. Yuqorida nomi keltirilgan futbolchilarning minimal yoshi 27 (ayrimlari 30dan oshgan)ga teng, ba’zilari mavsumlar oralig‘ida klubni tark etishlari mumkin. Shunday ekan, Karvalyu o‘z imkoniyatiga ega bo‘lishi turgan gap.
Ko‘pchilik Karvalyuni Kou-tinyoga qiyoslamoqda, uni braziliyalikka voris sifatida ko‘rishmoqda, ammo «Liverpul»ning yangi futbolchisini Roberto Firminoga o‘xshatsak, to‘g‘ri bo‘ladi. Hujumdagi foydali harakatlardan tashqari, Fabiu himoyaviy ishlarni ham esdan chiqarmaydi. Bu esa Saloh, Mane va boshqa hujumkor futbolchilar uchun ayni muddao.
A.ABDUVALIXO‘JAYEV tayyorladi
