«Liverpul» hujumchisi Muhammad Saloh «Oltin to‘p»ni qo‘lga kiritish asosiy maqsadi ekanligini aytdi.

«Dunyoning eng yaxshi futbolchisi sifatida tan olinishni xohlayotganimni inkor etmayman. «Oltin to‘p» esa maqsadlarim ro‘yxatida birinchi o‘rinda turadi.

Agar uni qo‘lga kiritsam, ikkinchisiga intilaman. Menga motivasiya beradigan murabbiy yoki boshqa birov kerak emas. 2021 yilgi o‘rnimdan hayratda qolganim rost (o‘shanda u ro‘yxatda 7-o‘rinni egallagandi.)

Chempionlar Ligasi finalida yaxshi o‘ynagan bo‘lsam ham, «Real»ga qarshi bahsdagi mag‘lubiyat, albatta, sovrinni qo‘lga kiritish imkoniyatini pasaytiradi. Ammo bu so‘nggi oylardagi o‘yinimni inkor eta olmaydi. Hakamlar hay’atining ovozini kutamiz. Agar 2022 yilda «Oltin to‘p»ni qo‘lga kirita olmasam, keyingisiga ega chiqish uchun bor kuchimni ishga solaman.

Misrlikning bunday mukofotni olishi Yaqin Sharq va Afrikada katta ahamiyatga ega bo‘ladi. Bu mamlakatlardagi yuz millionlab odamlar g‘ayrioddiy narsalarni qila olishlari mumkinligini tushunadi. Misrning bir qishlog‘idan chiqib, ko‘p narsaga erishdim. Misrga «Oltin to‘p» bilan kelsam, vatandoshlarim qanday munosabatda bo‘lishini tasavvur qilyapman», — deydi Saloh.

Ma’lumot uchun, Saloh 2021/22 yilgi mavsumda barcha musobaqalarda 51 o‘yinda maydonga tushib, 31 ta gol va 16 ta golga mualliflik qildi.