Ayni kunlarda Meksikaning Leon shahrida o‘smirlar o‘rtasida og‘ir atletika bo‘yicha jahon chempionati bo‘lib o‘tmoqda. 40 ga yaqin mamlakatdan 200 nafardan ortiq sportchi ishtirok etayotgan mazkur musobaqada terma jamoamiz vakillari ham yurtimiz sharafini himoya qilishadi.

O‘zbekiston og‘ir atletika federasiyasining ma’lum qilishicha, tajribali murabbiy Nurullo Tog‘ayev boshchiligida 4 nafar sportchimiz jahon chempionati medallari uchun kurash olib boradi. 18 iyunga qadar davom etadigan dunyo birinchiligida hamyurtlarimizning ishtiroki quyidagi sanalarga belgilangan:

14 iyun: Diyorbek Ermatov (-73 kg), 22:00;
16 iyun: Nigora Suvonova (-76 kg), 01:00;
17 iyun: Abrorbek Ma’rufbekov (-96 kg), 04:00;
18 iyun: Qudratbek Salimjonov (-102 kg), 04:00.

Dasturlar Toshkent vaqti bilan ko‘rsatilgan.

O‘zbekiston Milliy Olimpiya qo‘mitasi bo‘lajak musobaqada ishtirok etadigan barcha sportchilarimizga omad va g‘alabalar tilab qoladi.