"Arsenal" "Manchester Siti" hujumchisi Gabriel Jezusni qo‘lga kiritish ustida ishlamoqda.
The Times nashrining yozishicha, London klubining kelishuv muvaffaqiyatli amalga oshishiga ishonchi ortib bormoqda. Braziliyalik futbolchining o‘zi "Arsenal"ga o‘tmoqchi. Erling Xoland transferidan so‘ng Jezus "Man Siti"ni tark etishga qaror qildi.
"Kanonirlar" tomonidan qilingan birinchi taklifning hajmi 30 million funt edi. Endi "Arsenal" o‘z taklifini oshirib, uni "Man Siti" hujumchi uchun so‘ragan 50 million funtga yaqinlashtirishi kutilmoqda.
"Arsenal" bosh murabbiyi Mikel Arteta uchun Jezusning transferi yozdagi ustuvor vazifalardan biriga aylandi. Ular bir-birlarini yaxshi bilishadi. Hujumchiga “Tottenxem” va “Chelsi” klublari ham taklif bilan chiqishgan.
Bundan tashqari, "Arsenal" "Lester" yarim himoyachisi Yuri Tilemansni klubga o‘tishga ko‘ndira olishiga ishonchi komil.