Saudiya Arabistoni U23 terma jamoasi bosh murabbiyi Saad ash-SHehriy O‘zbekistonda bo‘lib o‘tgan Osiyo chempionati borasida o‘z fikrlari bilan o‘rtoqlashdi.

"Ushbu yosh toifasida Saudiya Arabistoni ilk marta chempionlikni qo‘lga kiritdi. Shu tariqa, mamlakatimiz futbol tarixida barcha yosh toifalaridagi Osiyo chempionatlarida g‘olib chiqdik. Bu biz uchun muhim ahamiyatga ega.

Ushbu futbolchilar 2018 yilda bo‘lib o‘tgan U19 Osiyo chempionatida g‘olib chiqishgan edi. Ular bilan birgalikda ishni davom ettirib, yana bir sovrinni qo‘lga kiritdik.

Final bahsiga to‘xtaladigan bo‘lsam, O‘zbekiston terma jamoasi o‘zining o‘yin uslubi bilan ba’zi vaziyatlarda bizni qiyin ahvolga solib qo‘ydi. Ammo biz birinchi bo‘lib gol urishga muvaffaq bo‘ldik. Shundan so‘ng ikkinchi golni raqib darvozasiga joyladik.

Ushbu avlod futbolchilari bilan ajoyib davrlarni boshdan kechirdim. Endi e’tiborni keyingi musobaqalarga qaratamiz. Asosiy maqsadimiz esa Parijda bo‘lib o‘tadigan Olimpiya o‘yinlariga yo‘llanmani qo‘lga kiritish", — dedi Saad ash-SHehri.