Yevropaning amaldagi chempioni - Italiya milliy jamoasiga nima bo‘ldi o‘zi?
Yevro-2020da g‘alaba nashidasini surib, barchaning olqishiga sazovor bo‘lgan Roberto Manchini boshqaruvidagi «skuadra adzurra» shundan buyon o‘z muxlislarini ranjitish bilan ovora...
Italiya milliy jamoasi Yevropa birinchiligidagi zafardan keyin JCH-2022 saralash bosqichida muvaffaqiyatsizlikka uchradiki, shuning o‘zi italyanlar uchun mislsiz alam hisoblanadi. Boz ustiga, «skuadra» Qatar mundiali yo‘lida «pley-off» raundining yarim finalida kamtarin Shimoliy Makedoniya termasiga yutqazib qo‘ydi, yana o‘z maydonida. Tushunarliki, mag‘rur italyanlar uchun bunday omadsizlikni hazm qilish oson emas. Endi ma’lum bo‘lyaptiki, bu hali holva ekan. Har holda, Italiya milliy jamoasi omadsiz «sirpanish»da davom etyapti, mag‘lubiyat mag‘lubiyatga ulanmoqda.
Diqqat qiling, «skuadra adzurra» oxirgi 2 oyda o‘z tarafkashlarini naq 4 bora ranjitdi. Eng og‘riqli alam - bu jamoaning Qatar-2022 tomoshabiniga aylangani, albatta. Biroq italiyaliklarning «finalissima» atalmish katta o‘yinda Argentina termasi va YEMLda nemislar oldida hech narsa qilolmaganlari alami ham past emas...
Darvoqe...
Hozirda JCH-2018 chempioni va Yevro-2020 finalchisida ham xuddi Italiya termasi kabi nimalardir sira o‘xshamayapti. Har holda, Fransiya va Angliya termalari oxirgi FIFA kunlarida o‘z muxlislarini kuchli xavotir ostida qoldirdi. Ayniqsa, jahon chempionati starti tobora yaqinlashayotgan pallada bunday holatning yuzaga kelgani xavotir ko‘lamini oshirib yubormoqda. Axir har ikki terma jamoa ayni payt Yevropa Millatlar Ligasida o‘z guruhining yaqqol autsayderi bo‘lib turibdi.
