Germaniya terma jamoasi sobiq darvozaboni Oliver Kan Madridning «Real» klubi Chempionlar ligasi chorak finali javob uchrashuvida Myunxenning «Bavariya»siga qarshi o‘yindagi (3:4) hakamlikdan norozi bo‘lganiga izoh berdi. Uchrashuv so‘ngida Ispaniya jamoasi yarim himoyachisi Eduardo Kamavinga maydondan chetlatilgan edi.
«Bunga chek qo‘yish kerak. Ular yana qancha vaqt jazosiz qolishlari mumkin? Agar biror narsa «Real»ning rejasi bo‘yicha ketmasa, darrov tartibsizlik boshlanadi. Ular hakamning har bir qarori o‘z foydalariga bo‘lishini xohlashadi. Endi ular qanday qilib 15 ta Chempionlar ligasi titulini qo‘lga kiritgani tushunarli», — deya sobiq futbolchining so‘zlarini Marca gazetasi keltiradi.
«Real» ikki o‘yin natijasiga ko‘ra «Bavariya»ga 4:6 hisobida imkoniyatni boy berdi va UYEFA Chempionlar ligasining joriy mavsumidagi ishtirokini yakunladi.
