Германия терма жамоаси собиқ дарвозабони Оливер Кан Мадриднинг «Реал» клуби Чемпионлар лигаси чорак финали жавоб учрашувида Мюнхеннинг «Бавария»сига қарши ўйиндаги (3:4) ҳакамликдан норози бўлганига изоҳ берди. Учрашув сўнгида Испания жамоаси ярим ҳимоячиси Эдуардо Камавинга майдондан четлатилган эди.
«Бунга чек қўйиш керак. Улар яна қанча вақт жазосиз қолишлари мумкин? Агар бирор нарса «Реал»нинг режаси бўйича кетмаса, дарров тартибсизлик бошланади. Улар ҳакамнинг ҳар бир қарори ўз фойдаларига бўлишини хоҳлашади. Энди улар қандай қилиб 15 та Чемпионлар лигаси титулини қўлга киритгани тушунарли», — дея собиқ футболчининг сўзларини Marca газетаси келтиради.
«Реал» икки ўйин натижасига кўра «Бавария»га 4:6 ҳисобида имкониятни бой берди ва УЕФА Чемпионлар лигасининг жорий мавсумидаги иштирокини якунлади.
