"Arsenal" "Manchester Siti" hujumchisi Gabriyel Jezusni sotib olishga rozi bo‘ldi, deb yozadi jurnalist Fabrisio Romano o‘zining Twitter sahifasida.

Tomonlar 45 million funt sterling miqdoridagi summaga kelishib oldilar. Oldinroq "kanonirlar" 25 yoshli braziliyalikga haftasiga 200 ming funt maosh to‘lashga tayyor ekani ma’lum bo‘lgandi.

O‘tgan mavsumda futbolchi "Manchester Siti" safida 41 ta o‘yin o‘tkazib, 13 ta gol urgan va 12 ta golli uzatmani amalga oshirgan.

Uning shartnomasi 2023 yilning iyunigacha amal qiladi. Transfermarkt tomonidan Jezus 50 million yevroga baholangan.