Bundan to‘rt yil avval, 2018 yilning 25 iyun sanasida Ravshan Ermatov o‘zining oxirgi Jahon chempionatida o‘n birinchi o‘yinini boshqargandi.

Ermatov Rossiyada bo‘lib o‘tgan musobaqada mundiallardagi 11-o‘yinini o‘tkazib, jahon rekordini o‘rnatgandi. Uning so‘nggi o‘yini guruh bosqichi doirasidagi Ispaniya va Marokash o‘rtasidagi uchrashuvga to‘g‘ri kelgan. Bellashuv 2:2 hisobidagi durang bilan yakunlangan.

O‘shanda uning Rossiyadagi musobaqadayoq o‘z rekordini yangilashi mumkinligi va Qatar—2022 da bu natija yana yaxshilanish ehtimoli yuqoriligi haqida gapirilgandi. Ammo Rossiyada u boshqa o‘yinni boshqarmadi, bunga yordamchisi Abduhamid Rasulovning jarohati sabab bo‘lgani aytiladi. Keyinchalik esa Ermatov hakamlik faoliyatini yakunladi.

Ravshan Ermatov hozirda O‘zbekiston futbol assosiasiyasi vise-prezidenti hisoblanadi.

Ma’lumot uchun, Ermatov Rossiya—2018 dan tashqari, JAR—2010 va Braziliya—2014 musobaqalarida hakamlik qilgan.