Avstriya milliy jamoasining Ralf Rangnik boshqaruvidagi ilk o‘yinlari noodatiy tus oldi.
Birinchidan, germaniyalik murabbiyning debyuti Xorvatiya termasiga qarshi o‘yin (EML 1-turi)ga to‘g‘ri keldi va unda avstriyaliklar kuchli raqibni 3:0 hisobida yengishdi. Daniya termasi bilan bo‘lgan ikkinchi o‘yin esa futbol atrofidagi g‘alati hodisotlarga ulandi...
* Avstriyaliklar 10 iyun kuni Fransiya termasini aynan «Ernst Xappel»da qabul qilishdi. YEML 3-turidan o‘rin olgan bu uchrashuvda 1:1 hisobi qayd etildi. Demakki, stadionga bog‘liq muammoni tezda hal qilishgan.
* Avstriyada bir necha kun tinmagan jala suv toshqinlarini keltirib chiqardi. Ko‘chalarni suvdan «tozalash» ishlariga o‘t o‘chiruvchilar ham jalb qilinishdi. Yuqori Avstriyada esa 30 ming xonadon elektr energiyasiz qoldi.
Avvaliga Avstriya poytaxti - Venada joylashgan «Ernst Xappel» stadionida yuzaga kelgan elektr ta’minotiga bog‘liq uzilish tufayli o‘yin 1,5 soatga kechiktirildi. Umuman, o‘sha kuni nafaqat stadion, balki butun atrofda elektr tizimi ishdan chiqdi, oqibatda xiyobondagi attraksionlar ham to‘xtab qoldi, odamlar ma’lum muddat bir necha metr balandlikda o‘tirishdi. Xonanda Falco guruhining Out of the Dark qo‘shig‘ini hazil tariqasida kuylayotgan vaqt stadion chiroqlari yondi va o‘yin boshlandi.
Eng qizig‘i, arena zulmatdan qutulgach, hamma maydon o‘rtasida paydo bo‘lgan kattagina chuqurlikka e’tibor qaratdi. Bundan ayniqsa, daniyalik hujumchi Andreas Skov Olsen g‘oyat ajablandi. Har holda, u to‘satdan yuzaga kelgan chuqurlik darajasini ko‘rsatish uchun hattoki, oyog‘ini teshikka suqdi. Izoh berilishicha, stadionda katta «o‘ra» paydo bo‘lganiga Avstriyada kuzatilgan kuchli yog‘ingarchilik sababdir. To‘g‘ri, bu yakuniy xulosa emas, hozircha barchasi o‘rganilmoqda.
