"Nasaf" bosh murabbiyi Ro‘ziqul Berdiyev AGMKga qarshi bo‘lib o‘tgan o‘yin (2:2) borasida o‘z fikrlari bilan o‘rtoqlashdi.

— Birinchi bo‘limda o‘yinni nazorat qilib, hisobda oldinga o‘tib oldik. Ikkinchi bo‘limning dastlabki 30 daqiqasida juda ham yomon o‘ynadik. Buning natijasida AGMK 2ta gol urib, oldinga o‘tib oldi. Biz esa o‘zimizda kuch topib ikkinchi golni urdik. Shundan keyin ham golli vaziyatlar yaratdik, ammo ularni golga aylantirishda omad yetishmadi. Shuning uchun bugun AGMK ham, "Nasaf" ham 2tadan ochko yo‘qotdi. Bu esa boshqa raqiblar uchun qo‘l keldi.

Bugun biz g‘alabaga yaqinroq edik. Ikkinchi taymda ham birinchi bo‘limdagi o‘yinimizni davom ettirganimizda hisob boshqacha bo‘lishi mumkin edi. Bilmadim, bu charchoq alomatimi... Tanaffusda yigitlarga aslo bo‘shashish kerak emasligini, hali g‘alaba qo‘lga kiritilmaganini ta’kidlagandik.

— "Nasaf" kimning xatosi evaziga gollar o‘tkazib yubordi, deb o‘ylaysiz?
— Bizda maydon markazida Akmal Mozgovoy va Marko Stanoyevich o‘ynashadi. O‘sha vaziyatda Akmal raqib futbolchisini ta’qib qilib qanotga ketib qoldi. Uning o‘rnini Marko to‘ldirishi kerak edi. Ammo u ham futbolchini nazardan qochirdi. Eronlik futbolchi esa ochiq vaziyatga chiqib zarba berdi va gol urdi.

— FIFA kunlaridan so‘ng "Nasaf" 2ta o‘yin o‘tkazib, ularda durang qayd etdi. Bu jamoa uchun yo‘qotishmi yoki ijobiy natija?
— Umuman olganda, bu yo‘qotish. Biz har bir o‘yinda maksimum harakat qilyapmiz. Ammo 2 o‘yinda 4 ochko — bu katta yo‘qotish.

— Mavsumning yarmi deyarli o‘tdi. Joriy mavsumda qaysi jamoalarda chempionlik uchun imkoniyat yuqori, deb o‘ylaysiz?
— Chempionlikka da’vogar klublar o‘zlarini ko‘rsatib, jadvalning yuqori pog‘onalarida borishmoqda. Xabaringiz bor, avvalgi yillarda chempionlik uchun 2-3ta jamoa kurash olib borardi. Bu yil esa 6ta jamoa chempionlik uchun kurashmoqda. Hozirda jamoalarning saviyasi tenglashib qoldi.

— Hozirda jamoaning moliyaviy ahvoli qanday?
— Jamoaning futbolchilar oldida qarzdorligi bor, ammo ko‘p emas. Ammo futbolchilar bu haqda o‘ylashayotgani yo‘q. Ular har bir bahsda bor kuchini berib harakat qilishyapti.