“Metallurg” hamda “Lokomotiv” jamoalari bugunga qadar kuchlilar safida o‘zaro 36  o‘yin o‘tkazgan. Ulardan 6 tasida “Metallurg”ning qo‘li baland kelgan. 11 ta uchrashuvda durang natija qayd etilgan. 19 o‘yinda esa temiryo‘lchilar zafar quchishgan. Kiritilgan va o‘tkazib yuborilgan to‘plar farqi – 34:60, toshkentliklar foydasiga.

Mazkur jamoalarning Bekobodda o‘tkazilgan uchrashuvlariga nazar tashlaydigan bo‘lsak, bu yerda ham ustunlik “Lokomotiv” jamoasi tomonida. Ortda qolgan 18 uchrashuvning 4 tasida mezbonlar zafar quchishgan. 7 ta o‘yinda kuchlar teng kelgan. 7 ta bahsda esa toshkentliklar muvaffaqiyatga erishishgan.

Quyida Bekobodda kechgan oxirgi beshta uchrashuv natijasi bilan tanishing:

01.10.2021  “Metallurg” – “Lokomotiv” – 1:2
25.09.2020  “Metallurg” – “Lokomotiv” – 2:2
12.05.2019  “Metallurg” – “Lokomotiv” – 0:0
14.09.2018  “Metallurg” – “Lokomotiv” – 0:1
26.05.2018  “Metallurg” – “Lokomotiv” – 2:0

“Lokomotiv” haqida

“Lokomotiv” mamlakatimizning eng kuchli va nomdor jamoalaridan biri sanaladi: uch marta mamlakat chempioni, uch marta O‘zbekiston kubogi sohibi va bir necha karra chempionat sovrindori bo‘lishgan. Bundan tashqari Superkubok bahslarida ham ikki marta muvaffaqiyatga erishgan.

Temiryo‘lchilar oliy liga bahslarida bugungacha 488 ta o‘yin o‘tkazib, shulardan 242 tasida g‘alaba qozonishgan. 100 o‘yinda durangga erishishgan bo‘lsa, 146 uchrashuvda imkoniyatni boy berishgan. “Lokomotiv” raqiblari darvozasini 783 marta ishg‘ol etgan holda, o‘z darvozalaridan 559 ta to‘p olib chiqishgan. Jamoaning milliy chempionatlarimizdagi eng yirik hisobdagi g‘alabasi – 7:0 (2015 – “So‘g‘diyona”, 2017 – “Obod”). Eng yirik mag‘lubiyati – 0:7 (2020 – “Paxtakor”).