Biz bugun sizga «Babayan Olmaliqni mahv etish uchun besh ming kishilik qo‘shin kifoya kildi» rukni orqali kechagi o‘yin to‘g‘risidagi kichkinagina fikrimizni havola etamiz. Qani unda tayyor bo‘lsangiz, boshladik.

Xabaringiz bor, kecha Superliga 13-tur doirasida turning markaziy uchrashuvi AGMK va "Navbahor" jamoalari o‘rtasidagi uchrashuv Olmaliq shaxrida bo‘lib o‘tdi, ha Olmaliq shaxrida. Lekin, o‘yinni kuzatgan odam bu uchrashuv Namanganda bo‘lgan deyishi tayin. Sababi shu kuni o‘yinni bevosita o‘yingohdan turib kuzatish maqsadida qariyb besh mingga yaqin namanganliklar o‘z suyukliklari ortidan Olmaliqqa yetib kelishdi, shunchaki bravo. Ayrim jamoalar o‘z uylarida shuncha muxlis yig‘ishni orzu qilib turishganda, "Navbahor" shuncha muxlisi bilan safarga boryapti. Ushbu holatda beextiyor, «Bu jamoa muxlislariga faqat chempionlik yarashadi» devorasan kishi.

Keling, endi o‘yinga to‘xtalib o‘tamiz.

O‘yin teng kurashlar ostida boshlandi. Uchrashuvda hisob 2-daqiqadayoq ochilishi mumkin edi. «Lochinlar» maestro'si Jamshid Iskanderovning o‘ng qanotdan havolatib jarima maydoni ichiga oshirib bergan to‘pini Rustam Ashurmatov darvozaga yo‘lladi biroq, to‘p darvoza ustuniga tegib maydonga qaytdi. «Lochinlar»ni dastlabki goli baribir o‘zini uzoq kuttirmadi. Uchrashuvning 10-daqiqasi o‘tib borayotgan bir vaqtda Jamshid Boltaboyevning Modrich uslubidagi zargarona uzatmasini qabul qilib olgan Jamshid Iskanderov bir urunishda to‘pni to‘xtatmasdan darvozabon ustidan havolatib «Parashyut» uslubida darvozaga yo‘lladi va mehmonlarni oldinga olib chiqdi — 0:1. Ushbu vaziyatda ikki Jamshid'lar katta sahnaga chiqishganini e’tirof etish lozim. Siz, goldan keyingi holatni his qilmoqchi bo‘lsangiz buning uchun "Navbahor" muxlislari orasida bo‘lishingiz kerak bo‘ladi. Ular shu kuni shu darajada muxlislik qilishdiki, "Navbahor" g‘alaba qozonmasdan boshka iloji yo‘q edi.  Shundan keyin ham har ikki jamoada bir qator imkoniyatlar paydo bo‘ldi. Lekin, birinchi bo‘limda darvozalarga boshqa to‘p kiritilmadi va jamoalar tanaffusga shu hisobda chiqib ketishdi.

Ikkinchi bo‘lim maydon egalari ustunligida boshlandi va o‘yinning 48-daqiqasida muvozanatni tiklashdi. Sanjar Tursunovning uzatmasini qabul qilib olgan Shohruh Gadoyev O‘tkir Yusupovni ojiz qoldirdi — 1:1.

Javob golidan keyin mehmonlar ustozi maydonga yangi kuchlarni tashladi va yakunda bu o‘zini oqladi. Uchrashuv asosiy vaqtining yakunlanishiga to‘qqiz daqiqa qolgan bir vaqtda "Navbahor"ning «Maykon»i Davron Hoshimov to‘pni o‘ng qanotdan havolatib AGMK jarima maydoni ichiga tashlab berdi. Ushbu vaziyatda hammadan baland sakragan Zoran Marushich to‘pni boshi bilan Valijon Rahimov qo‘riqlayotgan darvozaga yo‘lladi va mehmonlarni oldinga olib chiqdi — 1:2. Goldan keyin esa mehmonlar o‘tirgan tribuna chinakamiga «yondi». O‘yindan keyin esa namanganlik muxlislar haykirig‘i Olmaliqning chekka yeridagi odamlarni ham «vahimaga» solgani haqida gap so‘zlar tarqaldi.

Men bekorga muxlislarni ko‘p tilga olmayapman. Kecha "Navbahor" muxlislari juda katta kuch edi. Biz xohlardikki, boshqa jamoa muxlislari ham shu muxlislardan o‘rnak olishsa...

Shu tariqa, o‘yin «Lochinlar»ning g‘alabasi bilan yakunlandi.

Ayni damda, "Navbahor" 12 o‘yindan so‘ng 24 ochko jamg‘arib turnir jadvalida karvonboshi bo‘lib turibdi. Samvel Babayan shogirdlari 5 iyul sanasida qoldirilgan tur o‘yinida "Olimpik"ka qarshi mehmonda saf tortishadi.

Olimjon Ahmedov.