"Real" va "Fiorentina" hujumchi Luka Yovichning to‘liq transferi bo‘yicha kelishib oldi.
Jurnalist Fabrisio Romano xabariga ko‘ra, serbiyalik hujumchi “Fiorentina” safiga tekinga borib qo‘shiladi. "Real Madrid" forvardning keyingi transferidan tushgan mablag‘ning 50 foizini oladi. Yovich shu hafta Italiya klubida tibbiy ko‘rikdan o‘tadi.
"Real Madrid" shuningdek 21 yoshli markaziy himoyachi Mario Gilaning "Lasio"ga o‘tishiga rozi bo‘ldi. Transfer summasi 6 million yevroni tashkil qiladi. Ispaniyalik futbolchi bilan shaxsiy shartnoma shartlari kelishib olindi.
Yovich 2019 yilning iyun oyida Frankfurtning “Ayntraxt” klubidan “Real”ga 65-70 million yevro evaziga o‘tgan edi. 24 yoshli forvard o‘tgan mavsumda madridliklar safida 19 ta o‘yinda maydonga tushib, 1 ta gol urishga muvaffaq bo‘ldi. U "Real Madrid"da o‘ynagan vaqt davomida 51 ta o‘yinda 3 ta gol urgan.
Gila "Real Madrid" safida La Ligada atigi 2 ta o‘yinda maydonga tushdi, asosan Madridning 3-diviziondagi ikkinchi jamoasida o‘ynadi.
