"Реал" ва "Фиорентина" ҳужумчи Лука Йовичнинг тўлиқ трансфери бўйича келишиб олди.

Журналист Фабрицио Романо хабарига кўра, сербиялик ҳужумчи “Фиорентина” сафига текинга бориб қўшилади. "Реал Мадрид" форварднинг кейинги трансферидан тушган маблағнинг 50 фоизини олади. Йович шу ҳафта Италия клубида тиббий кўрикдан ўтади.

"Реал Мадрид" шунингдек 21 ёшли марказий ҳимоячи Марио Гиланинг "Лацио"га ўтишига рози бўлди. Трансфер суммаси 6 миллион еврони ташкил қилади. Испаниялик футболчи билан шахсий шартнома шартлари келишиб олинди.

Йович 2019 йилнинг июнь ойида Франкфуртнинг “Айнтрахт” клубидан “Реал”га 65-70 миллион евро эвазига ўтган эди. 24 ёшли форвард ўтган мавсумда мадридликлар сафида 19 та ўйинда майдонга тушиб, 1 та гол уришга муваффақ бўлди. У "Реал Мадрид"да ўйнаган вақт давомида 51 та ўйинда 3 та гол урган.

Гила "Реал Мадрид" сафида Ла Лигада атиги 2 та ўйинда майдонга тушди, асосан Мадриднинг 3-дивизиондаги иккинчи жамоасида ўйнади.