Argentina terma jamoasi hujumchisi Anxel Di Mariya “Yuventus”ga o‘tishini yakunlash uchun Turinga yetib keldi. Jurnalist Fabrisio Romano o‘yinchining samolyotdan tushayotgani aks etgan videoni tvitterda qoldirdi.
Avvalroq, 8 iyul, juma kuni Di Mariya “Yuventus” bilan shartnoma imzolashdan oldin tibbiy ko‘rikdan o‘tishi ma’lum bo‘lgan edi. Argentinalik futbolchi 1 yil muddatga shartnoma imzolaydi.
1 iyul kuni 34 yoshli argentinalik futbolchining "PSJ" bilan shartnomasi yakunlangani sababli erkin agentga aylandi. U parijliklar safida 2015 yildan buyon o‘ynab kelayotgan edi.
Di Mariya o‘tgan mavsumda 31 o‘yinda maydonga tushib, 5 gol urdi va 9 golga assistentlik qildi.
