«Bavariya» bosh murabbiyi Yulian Nagelsmann va klub haqida yozgan jurnalist ayol o‘rtasida muhabbat nish urmoqdami?
Shunday bo‘lsa, ayol bu sevgi yo‘lida ilk to‘siqqa duch keldi - uni Myunxen klubi bilan ishlash vakolatidan mahrum qilishdi. Manfaatlar mojarosimi?
Yosh murabbiy Yulian Nagelsmanning shaxsiy hayotida katta o‘zgarishlar bor. Bild nashri jurnalistlari Kristian Falk va Tobias Altsheffl iyun oyi boshida «Bavariya» ustozi 15 yillik turmushdan so‘ng rafiqasi Verena bilan ajrashgani haqida xabar berishdi. Shundan ko‘p o‘tmay, Sport1 nashrida murabbiyning shaxsiy hayotiga doir yana bir ma’lumot paydo bo‘ldi: «Nagelsmann endilikda Bild jurnalisti Lena Vursenberger bilan uchrashmoqda». U «Bavariya» haqida yozishga mas’ul edi. Tez orada Yulian va Lenaning dam olish vaqti yaxtada tushgan suratlari ham keng tarqaldi.
Bild tahririyati bunga darhol munosabat bildirib, barchasini tasdiqladi:
*** Gazetada yozilishicha, juftlik o‘rtasidagi aloqalar ovoza bo‘lgach, Lena darhol «Bavariya»ga daxldor yangiliklarni yoritish vakolatidan mahrum qilindi.
*** Yulian Nagelsmann va Lena Vursenberger hozir ta’tilni Ibisada birga o‘tkazishmoqda.
Bild nashridan farqli o‘laroq, «Bavariya»da yangi muhabbat qissasidan ko‘pchilik xabardor edi. Qayd etilishicha, Nagelsmann anchagacha barchasini sir tutishga uringan, lekin oxir-oqibat, hayotidagi o‘zgarishlarni klub rahbarlariga aytishdan o‘zga chora topolmagan. Ma’lumot uchun, Yulianning avvalgi turmushidan ikki farzandi bor - o‘g‘li 7 yoshda, qizalog‘i atigi 2 yoshda. «Bavariya» bosh murabbiyi sobiq rafiqasi bilan maktabda tanishgan va 2018 yili oila qurgandi. To‘g‘ri, Nagelsmann 2019-2021 yillar oralig‘ida Leypsigda yolg‘iz yashadi, zero, Verena farzandlari bilan Myunxenda qolgandi. Iyun oyi boshida esa Nagelsmann oilaning umumiy uyidan chiqib ketgani ma’lum bo‘ldi.
Murabbiyning yangi mahbubasiga kelsak, u 30 yoshda (Yulian yaqinda 35 yoshga to‘ladi). Lena avvaliga «Verder» haqida yozgan bo‘lsa, keyinchalik Myunxenga ko‘chib o‘tdi va oxirgi 2 yil davomida «Bavariya» o‘yinlarini kuzatib bordi. Umuman, Vursenberger xonim klub futbolchilariga yaxshi tanish. Har holda, ulardan tez-tez intervyu olardi. Misol uchun, Lena yaqinda Bild uchun jamoaning yangi a’zosi Sadio Mane haqida maqola tayyorlagandi. Endi jurnalist ayol boshqa jamoa bilan ishlashga o‘tsa kerak. Aytgancha, Lena aslida «Bavariya» emas, «Myunxen»ga muxlislik qiladi. Nagelsmann esa bu klubda yoshlar darajasida o‘ynagan va murabbiy sifatida faoliyat yuritgan.
Manba: sports.ru, Johongir MIRZO tayyorladi
