"Yozgi transfer “oynasi”dan samarali tarzda foydalanib, o‘z tarkibini kuchaytirishga harakat qilayotgan jamoamiz tarkibiga qirg‘izistonlik tajribali hujumchi Mirlan Murzayev qo‘shildi.
Murzayev 1990 yil, 29 martda Qirg‘izistonning Botkent viloyati, Sulyukta shahrida tug‘ilgan.
Futbolchilik faoliyati davomida Qirg‘iz Respublikasining “Muras - Sport” (Bishkek, 2006 yil), “Dordoy” (Bishkek, 2007-2010, 2012-2013, 2014-2015, 2019-2021 yillar), “Kara-Balta” (Kara-Balta, 2018 yil), Rossiyaning “Lokomotiv” (Moskva, 2010 yil), Turkiyaning “Denizlispor” (Denizli, 2014 yil), “Afjet Afyonspor” (2015-2016 yillar), “Ushakspor” (2016-2017 yillar), “Serik Belediyespor” (2017-2018 yillar), “Somaspor” (2018-2019 yillar), Isroilning “Xapoel” (Petax-Tikva, 2011-2012 yillar), Kiprning “Dogan Turk Birligi” (2019 yil), Hindistonning “Chennayin” (Chennayi, 2021 yil) jamoalarida o‘ynagan.
Mirlan Murzayev joriy mavsumning 1-davrasida Qirg‘iz Respublikasining “Olg‘a” (Bishkek) jamoasida to‘p tepgan.
Tajribali hujumchi Qirg‘iziston yoshlar (2009 yil), Qirg‘iziston olimpiya (2010 yil) terma jamoalarida o‘ynagan.
Murzayev 2009 yildan buyon Qirg‘iziston milliy terma jamoasiga nomzod futbolchi sanaladi va shu kungacha o‘z yurti milliy terma jamoasi tarkibida 55 ta o‘yinda maydonga tushib, 15 ta golga mualliflik qilgan.
Jumladan, shu yilning mart oyida Namanganda bo‘lib o‘tgan Navruz Cup – 2022 turnirida milliy terma jamoamiz darvozasiga ham gol urishga muvaffaq bo‘lgan (o‘sha o‘yinda terma jamoamiz 2:1 hisobida g‘alaba qozongan).
"Biz Mirlan Murzayevga “Navbahor”dagi faoliyatida omad yor bo‘lib, “lochinlar”ning g‘alabalariga munosib hissasini qo‘shishiga tilakdoshmiz." - deyiladi "Navbahor"ning rasmiy bayonotida.
