Shu yilning 28 iyul – 10 avgust kunlari Hindistonning Chennay shahrida 44-Butunjahon shaxmat olimpiadasi o‘tkaziladi. Unda O‘zbekiston terma jamoasi a’zolari ham ishtirok etishadi. Nufuzli musobaqada jami 10 nafar shaxmatchi vatanimiz sharafini himoya qiladilar.

44-Butunjahon shaxmat olimpiadasida qatnashuvchi terma jamoamiz tarkibi ancha oldin e’lon qilingan edi. Biroq, keyinchalik ayollar terma jamoamiz tarkibida kichik o‘zgarish yuz berdi, Sarvinoz Qurbonboyevaning o‘rnini Afro‘za Hamdamova egalladi.

Butunjahon shaxmat olimpiadasi tarixiga nazar soladigan bo‘lsak, musobaqa 1924 yildan buyon o‘tkazib kelinadi. Rasmiy maqomga ega birinchi musobaqa 1927 yil Londonda bo‘lib o‘tgan. Musobaqa har xil ziddiyatli vaziyatlar sababli asosan tinch vaqtlarda tashkil etilgan bo‘lsa, 1950 yildan boshlab muntazam tarzda har 2 yilda bir marotaba o‘tkazib kelinmoqda.

O‘zbekistonlik shaxmatchilar ilk bora 1992 yil Filippinning Manila shahrida tashkil etilgan 30-Butunjahon shaxmat olimpiadasida mustaqil jamoa sifatida ishtirok etib, yakunda faxrli 2-o‘rinni egallashgan.

Ma’lumot uchun, 45-Butunjahon shaxmat olimpiadasi 2024 yil Vengriya poytaxti Budapesht shahrida o‘tkaziladi. 2026 yil o‘tkaziladigan 46-Butunjahon shaxmat olimpiadasi mezbonligi uchun O‘zbekiston ham davogarlik qilmoqda.

44-Butunjahon olimpiadasida ishtirok etadigan terma jamoamiz tarkibi bilan tanishing:

Erkaklar
GM Nodirbek Abdusattorov (2004 yili tug‘ilgan),
GM Nodirbek Yoqubboyev (2002),
GM Javohir Sindorov (2005),
GM Jahongir Vohidov (1995),
GM Shamsiddin Vohidov (2002),

Ayollar
WGM Nilufar Yoqubboyeva (2000),
WFM Umida Omonova (2006),
WCM Afro‘za Hamdamova (2009),
WFM Maftuna Bobomurodova (2006),
Marjona Malikova (2002).

Terma jamoamiz a’zolari 27 iyul kuni 44-Butunjahon olimpiadasida ishtirok etish uchun Hindistonga jo‘nab ketishadi.