2023 yilning yozida hujumchi Xarri Keynning "Tottenxem"dan "Bavariya"ga o‘tishi dargumon.
Avvalroq Kicker va Sport Bild nashrlari Robert Levandovski ketganidan so‘ng sof markaz hujumchisisiz qolgan Myunxen klubi ingliz futbolchisiga qiziqish bildirayotgani haqida xabar bergandi.
Sport1.de xabariga ko‘ra, boshqa ko‘plab hujumchilar kabi Keyn nomzodi ham bir necha hafta oldin "Bavariya" rahbariyati tomonidan muhokama qilingan, biroq ular unga qiziqishni oshirmaslikka qaror qilishgan, chunki klub rahbarlari ushbu hujumchining transferiga shubha qilishgan. "Bavariya" Xarrining Premyer-ligadan tashqarida o‘ynashiga ishonchi komil emas, shuningdek, Yulian Nagelsmanning o‘yin uslubiga mos kelishiga ham shubha qilmoqda.
Bundan tashqari, Keynni qo‘lga kiritish uchun klub katta mablag‘ sarflashi kerak bo‘ladi - "Tottenxem"ning transfer tovon puli va hujumchining maoshi 100 million yevrodan oshadi. "Bavariya" rahbariyati buni juda qimmat deb hisoblamoqda.
Yuqorida sanab o‘tilgan sabablarga ko‘ra Keynning Myunxen klubiga o‘tishi dargumon. Xarrining "Tottenxem" bilan shartnomasi 2024 yilning yoziga qadar amal qiladi.
