Tojikistonda o‘tkazilgan “CAFA Womenʼs Championship-2022” musobaqasida g‘oliblikni qo‘lga kiritgan O‘zbekiston ayollar milliy terma jamoasi yurtimizga yetib keldi. Delegasiyani Toshkent xalqaro ayeroportida O‘zbekiston futbol assosiasiyasi rahbariyati, OAV, muxlislar hamda keng jamoatchilik vakillari kutib oldi.
Futbolchilarni taqdirlash marosimi O‘zbekiston futbol assosiasiyasida davom etdi. Bayramona ruhda o‘tgan tadbir avvalida O‘FA birinchi vise-prezidenti Ravshan Ermatov futbolchilarimizni O‘FA prezidenti Abdusalom Azizov, qolaversa, butun futbol jamoatchiligi nomidan musobaqadagi g‘oliblik bilan tabrikladi. Ushbu natijaning ortida yurtimizda ayollar futboliga berilayotgan e’tibor, qolaversa ahillik va jamoaviy mehnat yotganini ta’kidlab o‘tdi.
“Keyingi yillarda ayollar sporti, xususan, futbolga berilayotgan e’tibor ortib bormoqda. O‘FA tomonidan ham ayollar futbolini rivojlantirish, ushbu yo‘nalishdagi mavjud sharoit va kamchiliklarni o‘rganib borish hamda uni bartaraf etish maqsadida ayollar qo‘mitasi tashkil etildi. Umuman olganda, bu yo‘nalishda tizimli rivojlanishni yo‘lga qo‘yish, ayollar futbolini yangi bosqichga olib chiqishni maqsad qilganmiz. Ayol futbolchilarimiz faoliyatlarini tugatganidan so‘ng ham futbol ichida qolishi, xususan, murabbiylik, hakamlik, seleksionerlik va menejerlik kabi yo‘nalishlarda bepul o‘qishlari uchun O‘FA tomonidan sharoitlar taqdim etilgan. Bu esa, o‘z navbatida, ayollar futboli mutaxassislarining oshishiga ham xizmat qiladi.
Terma jamoaga esa yaponiyalik murabbiylar shtabi jalb etildi. O‘z o‘rnida, natijalarimiz ham kundan kunga yaxshilanib bormoqda. Umid qilamizki, bu bilan to‘xtab qolmaysiz. Bunda-da yuqori maqsadlar — Olimpiada va Jahon chempionati yo‘lida tinmay mehnat qilib, o‘z ustingizda ishlab borishingizga ishonamiz”, deya ta’kidladi Ravshan Ermatov.
Shundan keyin bosh murabbiy Midori Honda ham so‘z olib, o‘tkazilgan turnir futbolchilarimizning xalqaro miqyosdagi tajribalarini yanada orttirishga xizmat qilgani, ularning nimalarga qodir ekanliklarini bilib olishlariga yordam berganini aytib o‘tdi. Jamoa nomidan terma jamoa sardori Nilufar Qudratova O‘FAga e’tibor uchun minnatdorchilik bildirdi. Tadbir yakunida futbolchilar pul mukofotlari bilan taqdirlandilar.
