Ispaniyaning “Real Madrid” klubi 2026 yil yozda Maykl Olise uchun 175 million yevro miqdorida taklif yuborishga tayyor. Klub prezidenti Florentino Peres fransiyalik hujumchini “Bernabeu”ga olib kelishga qat’iy qaror qilgan.

O‘zining driblingi va kreativligi bilan raqib uchun doimiy xavf solib turadigan Maykl Olise Chempionlar Ligasi chorak finali doirasida kechgan va “Bavariya”ning “Real Madrid”ga qarshi har ikkala uchrashuvida eng faollardan biri bo‘ldi va javob o‘yinining eng yaxshi futbolchisi deb topildi.

Avvalroq, “qirollik klubi”ning 160 million yevrolik taklifiga rad javobi berilgandi. “Bavariya” kuzatuv kengashi a’zosi Uli Xyoness esa yozgi transfer oynasi vaqtida jamoa vingeri Maykl Olisening sotilishi borasidagi gap-so‘zlarga munosabat bildirib, u 200 million yevroga ham sotilmasligini aytib o‘tgan edi.

Olise Myunxen klubi bilan 2029 yilga qadar imzolangan shartnomaga ega va uning kelishuvida tovon puli haqidagi band mavjud emas. Shunga qaramay, futbolchining o‘zi 2026 yil yozda “Real Madrid” safiga qo‘shilishga qarshi emas.

Ma’lumot uchun, Maykl Olise Germaniya klubidagi ikkinchi mavsumini o‘tkazmoqda. Futbolchi shu vaqtga qadar klub safida jami 100 ta uchrashuvda maydonga tushib, o‘z hisobiga 38 ta gol va 52 ta golli uzatmani yozdirib qo‘ygan. Transfermarkt portali uning qiymatini 140 million yevroga baholamoqda.