Poytaxtimiz Toshkentda yakuniga yetgan og‘ir atletika bo‘yicha o‘smirlar va yoshlar o‘rtasidagi Osiyo chempionatida hamyurtimiz Diyorbek Ermatov o‘smirlar o‘rtasida -73 kg vazn toifasida qatnashib, dast ko‘tarish mashqida oltin, ikki kurash bo‘yicha esa bronza medaliga sazovor bo‘ldi. Kecha bo‘lib o‘tgan Osiyo chempionatining yopilish marosimida biz iste’dodli sportchimizning musobaqa haqidagi fikrlari bilan qiziqdik.

“Musobaqa a’lo daraja o‘tdi. Yurtimizga ko‘plab davlatlardan mahoratli sportchilar tashrif buyurishdi. Haqiqatan raqiblarimiz bir-biridan kuchli edi. Kuchlilar orasida terma jamoamiz a’zolari ham yuqori natijalar qayd etgan holda O‘zbekiston sha’nini munosib himoya qildik, deb o‘ylayman. Men musobaqada o‘smirlar o‘rtasida -73 kg vazn toifasida dast ko‘tarish mashqida 137 kg natija bilan oltin, siltab ko‘tarish mashqida esa 150 kg natija bilan bronza medali sohibi bo‘ldim. Asosiy raqibim Tailand va qozog‘istonlik sportchilar bo‘lishdi. Yaqinda Meksikada bo‘lib o‘tgan Jahon chempionatida ishtirok etgan qozog‘istonlik sportchiga 1 kg farq bilan yutqazib qo‘ygandim. Natijada 2-o‘rinni qo‘lga kiritgan edim. Bu safar yurtimizda oltin medal sohibiga aylandim. Kelgusidagi oliy maqsadim – Olimpiada va Jahon chempionatlarida qatnashib, vatanimiz nomini dunyoga tanitish hamda Jahon rekordini yangilash”, — dedi Diyorbek Ermatov.