"Real" bosh murabbiyi Karlo Anchelotti "Ayntraxt" bilan UYEFA Superkubogi uchun o‘yinda jamoaga Chempionlar ligasida g‘alaba qozonishda yordam bergan futbolchilardan foydalanishini ma’lum qildi.
“Biz Chempionlar ligasida g‘olib chiqqan futbolchilarga tayanishimiz kerak. O‘tgan mavsumni Superkubokdagi g‘alaba bilan yakunlashimiz kerak. Biz qattiq ishlayapmiz va tayyorlanyapmiz. Hozir jamoaning tayyorgarligi eng yuqori darajada emas, lekin bu ijobiy belgi. "Yuventus" bilan o‘yindan so‘ng biz Superkubok uchun o‘yinga yaxshi holatda yaqinlashish uchun yukni kamaytiramiz", - dedi Anchelotti Mundo Deportivo bilan suhbatda.
UYEFA Superkubogi uchun “Real” – “Ayntraxt” uchrashuvi 11 avgust kuni Xelsinkidagi (Finlyandiya) “Olimpiya stadioni”da bo‘lib o‘tadi. Uchrashuv Toshkent vaqti bilan 00:00 da boshlanadi. Eslatib o‘tamiz, Madrid klubi UYEFA Chempionlar ligasining 2021/2022 yilgi mavsumi g‘olibiga aylandi, "Ayntraxt" esa Yevropa ligasida g‘olib chiqdi.
