Mamlakat milliy chempionati – Superliganing ikkinchi davra o‘yinlari oldidan Bekobodning “Metallurg” jamoasi futbolchilari tibbiy ko‘rikdan o‘tishdi. Jamoa a’zolarining barcha sog‘ salomat. Birinchi davraning oxirgi turlarini jarohat bois o‘tkazib yuborgan o‘yinchilar safga qaytishdi. O‘zbekiston olimpiya terma jamoasi tarkibida yoshlar o‘rtasidagi Osiyo kubogi final bosqichida jarohat olgan Ibrohim Ibragimov ham jarrohlik amaliyotidan so‘ng umumiy mashg‘ulotlarga qo‘shildi.

Tarkibni sezilarli ravishda yoshartirib olgan “Metallurg” chempionatning hal qiluvchi davrasiga qizg‘in hozirlik ko‘ryapti. Davralar oralig‘ida murabbiylar shtabi futbolchilarning jismoniy tayyorgarligidan tashqari o‘yin amaliyotiga ham jiddiy e’tibor qaratmoqda. Xususan, Pro-liga peshqadamlaridan biri “Andijon” (4:1), Tojikiston Respublikasining OFK kubogi musobaqasi pley-offiga chiqqan klubi – “Xo‘jand” (5:1) jamoalari bilan ko‘rik nazorat uchrashuvlari o‘tkazildi. Bugun Toshkent viloyati derbisi oldidan so‘nggi o‘rtoqlik uchrashuvi tashkillashtiriladi. Bekobodga Pro liga vakili – “Zomin” jamoasi tashrif buyuradi.