Ueston Makkenni yozgi transfer oynasida "Yuventus"ni tark etishi mumkinligi haqida xabarlar tarqalgan edi. Pol Pogbaning jarohati vaziyatga ta’sir qildi va Massimiliano Allegri Makkenni bilan hisoblasha boshladi.
Biroq, amerikalik yarim himoyachi ham "Yuventus"ning lazaretidan joy oldi. La Gazzetta dello Sport nashri xabariga ko‘ra, 23 yoshli futbolchi yelkasidan jiddiy jarohat olgan va taxminan bir oy maydonga tusha olmaydi.
Ueston Makkenni 2020 yilning kuzidan beri "Yuventus" sharafini himoya qilib kelmoqda. Bu vaqt ichida yarim himoyachi 75 ta rasmiy o‘yin o‘tkazib, 10 ta gol urdi va 3 ta samarali uzatmani amalga oshirdi.
A Seriyaning birinchi turida “Yuventus” “Sassuolo”ga qarshi bahs olib boradi. O‘yin 15 avgust kuni bo‘lib o‘tadi.
