"Manchester Yunayted" "Real" vingeri Marko Asensioga qiziqish bildirmoqda, deya xabar bermoqda The Sun.
26 yoshli hujumchining "qaymoqranglilar" bilan shartnomasi kelasi mavsum tugaydi, ammo ispan klubi uni uzaytirmoqchi emas va futbolchini sotmoqchi. Bunga Asensioning maosh bo‘yicha haddan tashqari ko‘p talab qilishi sabab bo‘lmoqda. "Real" uch karra Chempionlar ligasi g‘olibi transferi uchun 34 million dollar talab qilmoqda.
Hujumchi AQSHda Karlo Anchelotti qo‘l ostidagi mavsumoldi mashg‘ulotlarida qatnashdi va har uchala o‘rtoqlik uchrashuvida maydonga tushdi.
Asensio 2015 yildan beri "Real" futbolchisi. Futbolchi o‘tgan mavsumda Madrid klubi safida barcha turnirlar doirasida 42 ta o‘yinda maydonga tushib, 12 ta gol urgan va 2 ta golga assistentlik qilgan. Avvalroq Asensio "Malyorka" va "Espanyol"da o‘ynagan. 2016 yildan buyon hujumchi Ispaniya terma jamoasiga chaqirilgan.
