"Liverpul" himoyachisi Virjil van Deykning fikricha, shartnomadagi vaziyat o‘tgan mavsum oxirida Muhammad Salohning o‘yiniga ta’sir qilgan.

1 iyul kuni 30 yoshli misrlik futbolchi klub bilan shartnomasini 2025 yilning iyun oyi oxirigacha uzaytirdi. Avvalgi kelishuv 2023 yilning iyun oyi oxirigacha amal qilardi.

"Muhammad doimo mikroskop ostida. Albatta, Saloh o‘zini yaratdi, chunki u ajoyib o‘yinchi va har doim barqaror saviyani ushlab turishga qodir. Mavsum oxiriga kelib, ehtimol, aprel oyi atrofida uning shartnomasi haqida ko‘p gapirildi. Biz hammamiz insonmiz, menimcha, bu holat Salohga ta’sir qildi, lekin u ancha yuqori darajadagi o‘yin namoyish etishda davom etdi. Endi hammasi hal bo‘ldi, Muhammad shartnoma haqida o‘ylamaydi, u "Liverpul"da ekanligidan xursand, qolganlar ham bundan xursand", - dedi van Deyk Goal bilan suhbatda.

Saloh “Liverpul” safida 2017 yilning iyulidan buyon to‘p suradi. O‘tgan mavsumda hujumchi jamoasi safida 51 ta o‘yinda maydonga tushib, 31 ta gol urdi va 16 ta golli uzatmani amalga oshirdi.