"Ливерпуль" ҳимоячиси Виржил ван Дейкнинг фикрича, шартномадаги вазият ўтган мавсум охирида Муҳаммад Салоҳнинг ўйинига таъсир қилган.
1 июль куни 30 ёшли мисрлик футболчи клуб билан шартномасини 2025 йилнинг июнь ойи охиригача узайтирди. Аввалги келишув 2023 йилнинг июнь ойи охиригача амал қиларди.
"Муҳаммад доимо микроскоп остида. Албатта, Салоҳ ўзини яратди, чунки у ажойиб ўйинчи ва ҳар доим барқарор савияни ушлаб туришга қодир. Мавсум охирига келиб, эҳтимол, апрель ойи атрофида унинг шартномаси ҳақида кўп гапирилди. Биз ҳаммамиз инсонмиз, менимча, бу ҳолат Салоҳга таъсир қилди, лекин у анча юқори даражадаги ўйин намойиш этишда давом этди. Энди ҳаммаси ҳал бўлди, Муҳаммад шартнома ҳақида ўйламайди, у "Ливерпул"да эканлигидан хурсанд, қолганлар ҳам бундан хурсанд", - деди ван Дейк Goal билан суҳбатда.
Салоҳ “Ливерпул” сафида 2017 йилнинг июлидан буён тўп суради. Ўтган мавсумда ҳужумчи жамоаси сафида 51 та ўйинда майдонга тушиб, 31 та гол урди ва 16 та голли узатмани амалга оширди.
